Ті ставныд тӧданныд, мый вужвойтырлӧн шылада-драмаа театрын зэв бура завлиталӧ Женя Удалова. Сійӧ и спектакльяссӧ вуджӧдӧ, и фотоасьны удитӧ. Но понедельниксянь Женя петӧ шойччыны уджсьыс, дасьтысьны ыджыдджыктор кежлӧ. Йирым 23 лунӧ театрным мунӧ Йошкар-Олаӧ петкӧдлыны Л.Терентьевалысь "Ен югыдыс - тяпиын" пьеса. И вуджӧдчынысӧ ковмас... мен. Тӧрыт театрас паныдасим Светлана Гениевнакӧд, сійӧ юаліс, кыдзи ме кӧсъя вуджӧдчынысӧ, некор на эг видлы да. А кор и видлынысӧ: быд спектакль вывті тӧдчана, тырыс йӧз... Шуи локны "Ен югыдыс - тяпиын" вылас часӧн водзджык да кӧть текстӧ син водзын кутны, кор Женя вуджӧдчынысӧ кутас. Локті, Женя юасьӧ: "Дась?" - "Дась". - "Но, сідзкӧ, вуджӧдчыны кутан". Ме повзикодь, но ёнджыкасӧ - радлі. Мыйкӧ выльтор кӧть, адреналин. Адреналин, сы вӧсна мый буретш тайӧ спектакль бӧрас кутасны чолӧмавны драматургсӧ гӧгрӧс пасӧн , и залыс лоас тыр. И ачыс авторыс гижӧдсӧ кывзытӧг оз коль. Но ладнӧ. Ок, ёна жӧ и кевмыси, мед ставыс бур лоас. Пырим будкаас, Женя петкӧдліс, кытчӧ колӧ личкавнысӧ, кыдзи йӧзыскӧд видзаасьнысӧ, кор заводитны сёрнитнысӧ. Сэсся петаліс кытчӧкӧ. Локтіс да шуӧ, артистъяс пӧ ассяньыс мыйсюрӧ сӧрны кутасны, дасьтысь. Вот тайӧ да. Но мый вӧчны, босьтчӧма да, ог нин эновтчы. Всё, звукорежиссёрыс ӧвтыштіс кинас - заводит пӧ. Видзааси микрофонас. Лючки. Воссис занавес, Алёна Сметанина пондіс сёрнитны. Ме вуджӧді кык медводдза сёрникузясӧ. Друг пырӧ Женя - микрофонтӧ пӧ вунӧдін ӧзтны. Ӧзтіс да петіс. Артистъясыд сы вылӧ и артистъяс, мед выльӧн мыйкӧ лӧсьӧдавны. И медводдза актас ме тырбура тайӧс гӧгӧрвои. Пӧсьӧ и кӧдзыдӧ шыбитліс. Но всё, занавес, кост. Директорным матыстчис, шуӧ Женялы, гораджыка пӧ сёрнит микрофонад. Ой, кыдзи кокняліс. Женяӧн кӧ чайтісны, сідзкӧ, ставыс бур. "Ставыс лоӧ бур" - Рассыхаев Ӧльӧшлӧн - нималана коми драматурглӧн - девиз.
