Менӧ колльӧдіс бать,
Арся зэрыс кодь шог,
Шуис, синвасӧ дойпырысь веніг:
"Гортӧ регыдджык лок!"
А мен шӧпкӧдіс бадь:
"Енэж гортланьӧ ордымыд векни".

Коми мунымлӧн мич,
Коми кывнымлӧн от
Аслыс ышӧдіс сьӧлӧмӧс сетны:
"Менӧ видзас нӧ код?"
Лӧня казьтыштіс кыдз:
"Енэж гортланьӧ ордымыд векни".

Сьӧлӧм колаын ме
Видзи тэнӧ вой-лун,
Югыд син водзад кевмыси-бӧрді:
"Муса Енмӧй, эн мун!"
Менӧ окыштін тэ:
"Асьтӧ козьналысь ордымыд векни".

Г.В.Бутыревалӧн юбилей

Да, талун вӧлі збыль соборнӧй кевмысьӧм. Ме чайта, мый Г.В. Бутыревалӧн орд ордымыс веськаліс, и ачыс сійӧ медпыді сьӧлӧмкӧтшсяньыс кок чунь гыж йылӧдзыс кыліс лов выльмӧдан вынсӧ. И вӧлі тайӧ Татьяна Безгодоваӧн лӧсьӧдӧм сьыланкыв вӧсна. Кор сійӧ пернапасасис да пуксис рояль водзас, сьӧлӧмӧй дасьтысис кывзыны ен югыд шылад, ловтӧ пыдзыртысь кыв. Зэв ӧд сьӧкыд верлибртӧ сьыланкылавны, но Татьяналӧн артмис. И дзонь залыс бӧрдіс, кор экранас тыдовтчисны Г.Бутыревалӧн мам-бать чужӧмъясыс и югыда-югыда юргис сьӧлӧмысь петана гӧлӧс. "Казьтышт, Енмӧй, Василийӧс да Вераӧс..." Унаӧн, ме чайта, казьтыштісны ассьыныс ордвужсӧ. Быттьӧ вына югӧр ловзьӧдіс-бурдӧдіс йӧзсӧ, сьӧлӧмсянь сьӧлӧмӧ вуджис сквӧзь.
Эз кӧ гиж Галина Васильевна кывбуръяссӧ, вӧлі эськӧ татшӧм югӧрыс? Тӧдмалісны-ӧ ёрта-ёртнысӧ Галина Васильевна да Татьяна и Дмитрий, Надежда Мирошниченко? Артмис эз эськӧ татшӧм лӧсьыд концертыс? Со кыдзи морт олӧмыс тэчӧма: петкӧдлан мирыслы медбурсӧ, мый лолад эм. А сэсся Енмыс Ачыс вайӧдас колана йӧзсӧ, сетас вын вуджны сьӧдсӧ да дойсӧ.

Нимкодяся пелькӧдӧм ноутбукӧн. Зэв ыджыд аттьӧ Андрей Чемышевлы да Ӧньӧ Лавлы!

Зэр
Быттьӧ воссьӧны гуся ӧдзӧсъяс,
Быттьӧ шудланьыс ышӧдӧ вӧт,
Быттьӧ позьӧ на бурдыны ӧнісянь,
Быттьӧ вольсасьӧ морӧсад шӧвк...

Кыдзи виччысис зэвтчӧм вӧр-ваыс!
Кыдзи личмуніс ӧні друг!
Сэтшӧм кокни да мелі кӧръясас,
Кодыр муыс да ваыс руд.

Зэрыс малалӧ кокни чуньяснас
Сылань бергӧдчӧм корлысь бан:
Шуда радейтӧм быттьӧ тунавсьӧ,
Кодыр овсьӧ и ӧні, и тан.

Инструкция

Медся бур кывбурыд артмӧ сэк, кор овмӧдчан сьӧлӧмад да босьтан кодӧскӧ овны сэтӧн тэкӧд тшӧтш.