Зэр

Тайӧ рудӧдӧм лӧняс
Эзысь лелькуйтӧм чужӧ -
Сійӧ ӧтнасӧн кужӧ
Разьны сьӧлӧмсьыд вӧньяс.

Сэки югзьӧ лӧз енэжыс,
Кыпалӧ лолыд.
Сӧмын зэрыс оз кежав и
Бӧрсӧ оз волы...

Тыртӧм мӧвпъяса весь тӧлыс

В.С. Соловьёвлысь "11 июня 1898 г." кывбур комиӧдӧм

Кымӧръяслӧн пемыд кельӧб

Ӧшйис, быдмӧ - зэрмас вот...

Муыс кевмысьӧмӧн кевмӧ

Ловъя зэрлысь ловъя войт.

Сӧмын ыръянитӧ тӧлыс:

Вӧтлӧ кымӧръяссӧ бӧр...

Пӧжӧ-сотӧ важ моз скӧра,

Забеднӧыдла кӧть бӧрд.

Тадзи ловлысь югыд кӧсйӧм

Вӧтлӧ нок да тыртӧм удж,

Тыртӧм мӧвпъяса весь тӧлыс

Юрад пӧльтны кор оз мудз.

Шытӧм шы

В.С. Соловьёвлысь "Милый друг" кывбур вуджӧдӧм

Муса ёртӧй, он мӧй аддзы:

Ставсӧ, синъясӧн мый аддзам - 

Сӧмын югӧр, сӧмын вуджӧр

Сыысь, синнад мый он казяв?

Муса ёртӧй, он мӧй кыв тэ:

Трачкакылан тӧждыс-нокыс - 

Сӧмын дзугӧм йӧла горыс

Радейтчӧмлӧн шуда кыплӧн?

Муса ёртӧй, эн мӧй тӧдлы:

Ӧти Ен югыдас збыльыс - 

Кодыр ӧти сьӧлӧм мӧдкӧд 

Видзаасьӧ шытӧм шыӧн?

Телепатия

Ми кӧ сёрнилысь вунӧдім горсӧ,
Эгӧ лэдзӧй весь ни ӧти кыв,
Сэки кылім ми эськӧ, кыдз ворсӧ
Ёртлӧн сьӧлӧмас Енкӧла шы.

Пушкин А.С. "Что в имени тебе моём?" кывбур комиӧдӧм

***

Мый нимӧй менам сетас тэд?

Ӧд кулас сiйӧ ылi гы моз,

Нор шыӧн тёльснитас да сылас,

Войшӧрса вӧрын шы оз сет.

И быттьӧ тӧдтӧм кывлӧн сер,

Гувывса изйӧ важӧн гижӧм,

Оз висьтав сiйӧ тэныд нинӧм,

Оз казьтышт важӧн вошӧм кӧр.

Мый сыысь? Вошӧма нин сэн –

Выль майшасьӧм да гыяс пӧвстын,

Оз сет нин сiйӧ важ моз сӧстӧм

Да мелi казьтылӧмъяс тэн.

Но шог да лӧнь кор пуксяс лун,

Тэ казьтышт сiйӧс гажтӧмпырысь,

Шу: эм на сьӧлӧм, кысь эг вун,

Кӧн ловъя паметьыс ме йылысь.

Николай Гумилёвлысь "Слово" кывбур комиӧдӧм

Кыв

Коркӧ важӧн мирыс вӧлi выль на,
Енмыс эз на ылыстчы, и сэк
Шондiсӧ на сувтӧдлiсны кывйӧн,
Кывйӧн каръяс кисьтлывлiсны, дерт.


Сэки кутш эз лысьтлы лэбны вылӧ,
Кодзув повзьӧмла эз аддзыв ин,
Кодыр кывтiс, быттьӧ югыд кыа,
Енэж вывтi кывлӧн ыджыд вын.


Му выв олӧмлы сэк вӧлi лыдпас,
Быттьӧ гортса сийӧсалӧм скӧт,
Сы вӧсна мый вежӧртассӧ быдсӧн
Мудер лыдпас петкӧдлывлiс век.


И дзор пӧльӧ, мывкыдыслӧн быдтас,
Кодi тӧдӧ, бурыс-лёкыс кысь,
Лыа вылын серпасавлiс лыдпас,
Кывсӧ шуны весигтӧ эз лысьт.


Но мувывса майшасьӧмъяс вӧсна
Вунӧдiм, мый кывлӧн выныс эм,
Мый Бур Юӧрын Иоаннлӧн весьтас
Гижӧма, мый кывйыс – тайӧ Ен.


А ми сiйӧс йӧртiм чорыд тасӧ,
Индiм, медым мыччас гӧль му выв,
Ӧнi, быттьӧ эндӧм позйын мазi,
Чӧскыдтӧма кылӧ кулӧм кыв.

Кузебай Гердлысь "Чагыр кышет" кывбур вуджӧдӧм

Кельыдлӧз чышъян

Радейтчӧм – кельыдлӧз чышъян,
Эн бӧрд тэ сы вӧсна, эн!
Кадыслӧн визулыс пышйӧ,
Чусмӧ и чышъянлӧн рӧм!

Радейтысь мортыд – веж видз кодь,
Тувсовъя рӧмъясӧн тыр:
Синъясыс – лӧз пӧлӧзнича,
Сьылӧ да сералӧ пыр.

Зарниӧн мичмӧдом-кыӧм
Югъялӧ туйыслӧн рӧм,
Лым еджыд паськӧма нылӧн
Копыртчӧ туй весьтас льӧм.

Вунӧдас тэнӧ кӧ пӧлыд,
Пемыдас тайкӧ он сун,
Яръюгыд рӧмыс сэк – рӧмыд,
Чусмӧ да вушйӧ выль лун.

Эн бӧрд тэ сы вӧсна, эн!
Радейтчӧм – кельыдлӧз чышъян.
Чусмӧ и чышъянлӧн рӧм,
Кадыс кор визулӧн пышӥӧ…

Вичмис эз тэныд Му вылас?

Иван Бунин серти

Тайӧ лӧзалысь вӧрыс и лолалысь юыс,

Тайӧ матысмӧм енэжыс, туруныс, муыс…

Кадыс воас да, бать вошлӧм пиыслы шуас:

- Вичмис эз тэныд Му вылас сьӧлӧмпӧт шудыс?

Ставсӧ вунӧда сэки да казьтышта сӧмын,

Кыдзи пӧрӧ лӧз енэжӧ лӧзалысь вӧрным...

Таысь аттьӧсӧ шуны оз судз вочакывйӧ,

Сӧмын бӧрдӧмӧн сунгыся мылыштан сывйӧ.

2015.03.20

Ме некыдз эг виччысь

О, кыдзи дрӧгмуніс вынйӧра гӧлӧсыд! -

Личмуніс, лябмуніс, небзис.

Тадз небзьылӧ муыс,

Кор кӧтасьӧ зэрӧн,

Кӧть кутшӧм эз вӧв сійӧ зумыш.

Тадз орлывлӧ сьӧлӧмад медпыді сӧныд,

Кӧть кутшӧм эз вӧв сійӧ крепыд,

Тадз зэлалӧм кывбурыд лолӧ друг лӧньыд,

Тадз орӧдлӧ югыдсӧ пемыд…

Ме некыдз эг виччысь, мый тэ – тайӧ муыс,

Мый тэ – тайӧ сӧныс, и кывбурыс,  югыс!

Мый тэ – верман орны, и ляпмунны, сывны!

О, кутшӧм тэ вӧлӧмыд вынтӧм!

О, кутшӧм тэ вӧлӧмыд –

Вына!

2015.03.18

Югыд сьылан

***

Тэнад Лолыд – югыд сьылан,

Ачыс Енмыс сійӧс тэчліс!

Мыйта радліс, кодыр вӧчис,

Кодыр овны тэнӧ лэдзис!

Тэ кодь сьыланыс эз вӧвлӹ,

Да и оз нин сэсся лолы.

Кӧть и овлӧ: шогӧ вӧйлан,

Овлӧ, мый и пемдӧ лолыд…

Войыс турӧбалӧ, кылӧ -

Олӧмбыд нин, гашкӧ, тадзи,

Сӧмын Енмыс Тэнӧ аддзӧ,

Сӧмын Енмыс… Тэнӧ сьылӧ.

2015.02.23

Ловъя ловсяньыд ловъя лолӧдз

***

Ловъя ловсяньыд ловъя лолӧдз

Векни вӧлӧкыд сэтшӧм кузь…

Быттьӧ му весьтас Войвыв кодзув:      

Чайтсьӧ - матын, а он тай судз.

Войвыв кодзувлысь видлы юав:

Мыйла чусмӧма югыд син?

Кытчӧ вошӧма сӧстӧм югӧр?

Мыйла сьӧлӧмыс из кодь кын?

Гашкӧ, ачыс нин сійӧ кӧсйӧ

Юкны морӧсас пессьысь дой!

Сӧмын полӧ. Ачыс оз вӧзйысь:

Сэтшӧм овтӧм да ловтӧм вой.

Сэсся збоймӧ да висьтасьӧ помӧдз,

Ылькйӧ ытваӧн норасьӧм-мудз.  

…Сӧмын ловсяньыд ловъя лолӧдз

Векни вӧлӧкыд сэтшӧм кузь…

 2015.02.22

***

Тэ мунан шондіыслы паныд

Тэ мунан шондіыслы паныд,

Тэ мунан рытас, кӧні чӧв.

И Кыа – шоныд сывъя мамыд

Со окалӧ нин. Еджыд вӧв

Тэн дасьтӧма нин Енэж батьыд.

Тэ лэбзян шондіыслы паныд,

Но югӧрыс тай – небыд зэв,

Оз ёр, оз сот ни: быттьӧ йӧв

Лым еджыд юӧн лӧня кывтӧ,

Шог-майшасьӧмтӧ лым моз сывдӧ…

Тэ кылан, кыдзи сьылӧ

Чӧв.

Сӧмын видзӧдла нӧшта ӧтчыд

Николай Рерих серти

Сӧмын видзӧдла нӧшта ӧтчыд

Ставсӧ, эновта нэм кежлӧ мый:

Ылі туйын мед бӧрсянь оз вӧтчы,

Мед оз косӧд, мед нинӧм оз кый.

Со тай бать-мамӧй, чойӧй, вокӧй...

Со и ёртъяслӧн фотоыс важ.

Сэтшӧм тӧдса да муса фото...

Водзын виччысьӧ ыджыдджык гаж!

Кытчӧ мӧдӧдча, сепысыд оз ков.

Ставсӧ разӧда ёртъяслы скӧнь.

Медым сыланьӧ веськалас воськов,

Мездмӧм лолаӧс виччӧны кӧн!

Колӧ тэрмасьны меным сэтчӧ.

Шуи чорыда: нинӧм оз кый!..

...Сӧмын бӧръяысь, нӧшта ӧтчыд

Ставсӧ гӧгӧрта, эновта мый.

***

Кӧнкӧ дзибрӧс пыж кынмӧма берегас

Кӧнкӧ дзибрӧс пыж кынмӧма берегас,

Сэні пукалӧ йӧжгыльтчӧм лов.

Чӧла видзӧдӧ кодзула енэжас,

Еджыд бандзибас – синвасьыс сов.

Ёна доймӧ, кор сьӧлӧмнад лукасян

Тайӧ мувывса йиас. Оз пот,

Оз, оз пот на яй сьӧлӧмыд – бурасяс.

Сӧмын  мыйла нӧ сьӧкыд да шог?

Мыйла пукалан ӧтнадӧн, виччысян

Быттьӧ кутшӧмкӧ юӧр тэ сэсь,

Помтӧм енэжсьыс? Сьӧлӧмнад шыасян?

Лӧня чуксасян?.. Ывлаыс сэзь.

Сэтшӧм кӧдзыд. И нэмъяс пыр аддзан тэ:

Пуксис дорад пым сьӧлӧма лов.

Пӧся окыштіс китӧ и казьтыштіс:

«Тэкӧд вӧлі и лоа. Эн пов».

***

Тэнсьыд гӧлӧстӧ некор эг кывлы

***

Тэнсьыд гӧлӧстӧ некор эг кывлы.

Но ӧд эм сійӧ кӧнкӧ, эм…

Тайӧ му вылас тэтӧг ме кынма,

Сэтшӧм помтӧмӧн кажитчӧ нэм.

Сэтшӧм пемыдӧн кажитчӧ войыс,

Сэтшӧм кӧдзыдӧн шутлялысь тӧв…

Но ме тӧда, мый лача оз помась:

Разьсяс сьӧлӧмӧс топӧдысь кӧв.

Сӧвмӧм лэбачӧн жбыркнитас позсьыс,

Сылӧн бордыс – лӧз енэжлӧн от,

Кытчӧ визувтӧ йӧзыслӧн мӧвпыс,

Кытчӧ кайӧ и радлун, и шог.

Сійӧ сибӧдас найӧс. Босьтас.

Ставлы козьналас енэжлысь лич.

Гашкӧ, сэки, кор сьӧлӧмӧй воссяс,

Сійӧ кылас лӧнь гӧлӧслысь мич.

***

Ставыс на миянлӧн артмас!

Вероника Тушнова серти

Ставыс на миянлӧн артмас!

Мый вӧлі – бур ногӧн помасяс,

Шудным сэк тӧвру моз бордъясяс:

Лэбзьыштас ачыс!

Ставыс на миянлӧн артмас!

Уна туй быдлаӧ нуӧдӧ,

Бӧрйы, мый кӧсъян, и суӧдан

Визувтысь кадсӧ!

Шудыд ӧд – лэбач, тэ кылан?

Лэдз, медым кыпӧдчас енэжӧ,

Гашкӧ, и бӧрсӧ оз кежавлы,

Некор оз ылав!

Сійӧс ме гортӧ ог игнав,

Домавны ловсӧ ог надейтчы.

Лэбзян?... Бур туй тэныд, инӧ,

Ӧд шуда сё пӧв лоас

Аддзысьӧм! 

Сьӧлӧм колаын

Сьӧлӧм колаын тастӧ оз видзны.

Сыліс енэжын лэбалысь лов.

Быттьӧ саридзын гудралӧм сов –

Сэтшӧм топыда ёртъяскӧд йитчим.

Ӧткодь шылад ми кылам чӧв-лӧняс,

Ӧти кодзувлы нюжӧдам ки,

Ӧтмоз ымралӧ сёрниын би,

Ӧтног сьылӧны-зэвтчӧны сӧнъяс.

Ӧтмоз кыптӧны-ёнмӧны бордъяс,

Кӧть и быдӧнлӧн пасьтаыс – ас.

Восьса сьӧлӧм кад визувсӧ ордйӧ,

Он кӧ ӧшӧд тэ сы вылӧ тас.