Г.В.Бутыревалӧн юбилей

Да, талун вӧлі збыль соборнӧй кевмысьӧм. Ме чайта, мый Г.В. Бутыревалӧн орд ордымыс веськаліс, и ачыс сійӧ медпыді сьӧлӧмкӧтшсяньыс кок чунь гыж йылӧдзыс кыліс лов выльмӧдан вынсӧ. И вӧлі тайӧ Татьяна Безгодоваӧн лӧсьӧдӧм сьыланкыв вӧсна. Кор сійӧ пернапасасис да пуксис рояль водзас, сьӧлӧмӧй дасьтысис кывзыны ен югыд шылад, ловтӧ пыдзыртысь кыв. Зэв ӧд сьӧкыд верлибртӧ сьыланкылавны, но Татьяналӧн артмис. И дзонь залыс бӧрдіс, кор экранас тыдовтчисны Г.Бутыревалӧн мам-бать чужӧмъясыс и югыда-югыда юргис сьӧлӧмысь петана гӧлӧс. "Казьтышт, Енмӧй, Василийӧс да Вераӧс..." Унаӧн, ме чайта, казьтыштісны ассьыныс ордвужсӧ. Быттьӧ вына югӧр ловзьӧдіс-бурдӧдіс йӧзсӧ, сьӧлӧмсянь сьӧлӧмӧ вуджис сквӧзь.
Эз кӧ гиж Галина Васильевна кывбуръяссӧ, вӧлі эськӧ татшӧм югӧрыс? Тӧдмалісны-ӧ ёрта-ёртнысӧ Галина Васильевна да Татьяна и Дмитрий, Надежда Мирошниченко? Артмис эз эськӧ татшӧм лӧсьыд концертыс? Со кыдзи морт олӧмыс тэчӧма: петкӧдлан мирыслы медбурсӧ, мый лолад эм. А сэсся Енмыс Ачыс вайӧдас колана йӧзсӧ, сетас вын вуджны сьӧдсӧ да дойсӧ.